penholderlogo

 

 

 

Dialekt - isch  Audiolink-Indernedd


Ins Indernedd isch owends will,
doch leider, ja do brauchscht ko Brill,
in Stau uff Dadeautoboone,
dass`d särfe konscht brauchscht garnet moone.

Warum bezahl isch souviel Geld ?
Hab ko Vabinnung in die Welt.

Un wer is schuld ? Beschtimmt net oner.
Klappts sinn ses all, wenn net , donn koner !



©Siegfried Kornek

 

 



De Grieg  Audiolink-degrieg


Der Grieg, der is net rischtisch,
dess säischt da jedamonn.
Nur frog isch misch warum donn,
es doch passiere konn ?
Sinn Leit denn sou vergesslisch?
orah is nes sou egal,
dass `s Opfer soi is gräßlisch.

Denkt nooch, ä onzisch Mal.


©Siegfried Kornek

 

 

 


Des Läwe


"Koum bischd geborn, schunn werschte elda.
erscht willscht es jo, mol ehrlisch `s gfellt da.
Doch wonns hie wäidutt odder doo
bischt donn doriwer nem-me froh!

Jou - abwerts gäits des is gonz klar,
wonn frieha alles bessa war
unns kehrt wohl zu de Edikedde
wonn se nur iwwer Kronkhait redde?

Unn wenn vumm Greis enn kloona Schridd,
im Kopp zum Kind, de Fall oidridd,
gäit ma zum ofong donn zurick.
Beide hilflous uff oon Blick!

Donn kimmt des End, dess waas en jeda.
de one frieher, de ondre speeder.


© Siegfried Kornek

 

 

 


Morgengrauen


De Moie graut - des Wort des gfelltma,
was ma noch du muss, zomme zähld ma,
do will ma garnet aussem Bett.
Noch ä bissel Schloof gern hett,
do deet ma a die Zeit rum bringe,
hach - `s gibt sou viele Dinge,
die ma sou gern mol mache deed.

De Wecka klingelt - wass - sou speet?
Rausgeschprunge, ab ins Bad
Monn wass issa jetzt in Fahrt.
Die Werklichkait ihn laida hott.
*Seufz* - unn widda bischt im glaische Trott.

Ha - jetzt verschdäi isch, `s Rätsel is geleest,
warum es "Morgengrauen" heeßt!


©Siegfried Kornek




Räijewedda


Dess Weddar mies! - De Räije fälld.
Na gibts fa jeden Drobbe Geld
fa Petrus, der dess Wedda plohnd.
Viellaischd hott ers a gud gemohnd
fa Hobbygärtner unn a Bauarn.
Doch musses soi in Form vunn Schauarn,
die misch dorschnässe uff die Haud?
Dorsch-Pitsche-faahrn werd gonz vasaut
isch - wellsch ä Sauarai.
Drumm sag isch a gonz fronk unn frai
De Räije konn ma gschtohle blaiwe.
Wonn Petrus net waas, was jetzt draiwe
do konna aa - dess Ekel s`miese
nur mit de-Hond die Blumme gieße!


© Siegfried Kornek

 

 



De Hochzischdaag


De Hochzischdaag konn gfehrlich soi.
Denkschte nett dro, griegscht onie noi.
Vergischtn nett unnn bringscht paar Blumme,
bischt um de ärga rumgekumme.

Was hod donn fa enn Sinn der Dag,
imma des Muss isch garnett mag.

Wischtisch is, was er bedait
unn des zu zeige liebe Leit,
benetischt koon Termin enn feschte.
Des zeigt ma - oofach sou - omm beschte.

 ©Siegfried Kornek

 



Sigi


In Hemschbach wurd `n Kind gebor`n,
Noo, net (ich waas) im Galobb valoorn.
Unn wi er ofengd laud zu kreische,
die Nachbarn gladd vor Schreck erbleiche.
Doch wer ra donn viel ruhischer worn
- außer, wenn er volla Zorn.

Mit sexe donn die erschde Glass,
Ned grad soi Lieblingsb`schäftischung war`s.
Ä paar Johr spether säischt de Lehra,
net in die Volksschul noi meer gherd da.
Der lernt zu leischt , werd faula imma
un schläft donn oft im Klassezimma.

Dess säischt er awer zu de Mudda,
fa die war alles glei in Budda
Der Bu der kimmt noch Woinem jedzd,
domit is somit alles gschwetzd.
Aussuche durft er noch gonz kuhl,
Gymnasium odda Middelschul.

Der Bu hot sisch donn klar gedenkt,
im Abi zuviel Ärwett hengt.
Un weil de Ehrgeiz net sou stark,
die Middlschuhl longt, `s is net so arg.
Dort hod er efders donn gefehld,
die Fehldaag liewer net gezählt
un hot nur `s needischde geduh.
Die Hauptsach war er hot`t soi Ruh.

Un sou lawierd er sich donn a ,
dohrsch alle Priefunge, is doch glaar.
Die middla Reif noch mitgenumme,
unn iwerläigd, was soll jetzd kumme ?


©Siegfried Kornek


....................................................


Und hier ausnahmsweise ein mundartlicher Reim, dessen Original von
Herrn Albert H. Keil   http://home.arcor.de/verlag.pfalzmundart/ 
stammt und von mir ins Kurpfälzerische  "übersetzt" wurde.
Freundlicherweise hat er mir die Umänderung und Veröffentlichung genehmigt.


Die Erbsind



Zwa Mensche dunn im Paradies
sisch brav anährn mit Koulgemies
uff omool awer säischt die Schlong
Is aisch vumm Obscht tatsäschlisch bong?
Doo dro, ehr derft ma wärklich glaawe,
Derf net de Herrgott blous sisch laawe.

Ruckzuck, do wars Vaboot vagesse,
enn Abbel sommt de Grutz gegesse.
Zwar dutts de Hunga nett gonz schtille,
doch `s longd fa nackisch sisch zu fiele!
Drum gibts enn Schorz aus Feigeblädder,
vum Herrgott  -   un ä Dunnarwetta!

Ehr solld doch baim Salaad nur blaiwe.
Glai dutt moin Engl fort aisch draiwe.
wail dess die Erbsind is gewese.
Sou hamm mass in de Biewel g`lese.

Die Schlong hot dreggisch noch gelacht
unn donn sisch aus`m Staab gemacht!

.......................

 






 

 

Das Lautsprechericon  verweist auf die Audioversion des Reimes bzw. Gedichts.